مخدرات

السلام عليكم ورحمة الله تعالى وبركاته

اعزائي الاعضاء قرات اليوم قصيدة رااااااااااااااااائعة بكل ماتحملة الكلمة من معاني
مصاغة باسلوب بسيط وكلماتها منتقاة
تسلط الضوء على ظاهرة اجتماعية اصبح العالم اليوم يعاني منها الا وهي المخدرات
وبكثرة مااعجبتني وددت الا ان اضعها في المنتدى انشاء الله يارب تعجبكم انتم ايضا


هذي الدنيا لوكان جات تتعاود ماذابيا
نعاود حياتي ملي بدات حتى للدقيقة هاذيا
نروح نصلي زوج ركعات نطلب الله يعفو عليا
او يغفرلي كل مافات ونطلب السماح من والديا
عملتلهم بزاف حاجات وكويتهم بشحال من كيا
بابا تعذب ويما بكات ودعوتهم راهي اتبع فيا
حتى حياتي كامل ولات غير عذاب وميزيريا
وين نحلق نلقاها طفات دايما بلية موراها بليا
طول النهار هايم وين جات وندخل للدار غير لعشيا
ندخل غير باش نبات نلقى يما تستنى فيا
اتدخلني غير بالسكات تسكت فيا وتخبي عليا
وتخسر عليا زوج كلمات آه ياخسارة التربية
واش جابت او واش ربات واش تعبت وسهرت عليا
رجعتلها زوج دمعات والله عيب او خسارة عليا
وحتى خواتاتي لبنات الي كانوا يشوفوا فيا
انا الخو وانا لبابات عادوا هوما يخافوا عليا
يلعن ديك الساعة بالذات ساعة وحدة لعبت بيا
ماننساهاش طول لحياة تبقى دايما بين عينيا
فديك الدقيقة لحكاية بدات جاو ناس دارو بيا
ندو ونجيبو فالحكايات وبدات الريحة تجبد فيا
قالولي ماجابت مادات ذوق وشوف شحال خلوية
جبد غير وحدة وفرات تشوف كي تنسى هم الدنيا
قلت معليش نهار اوفات مانظنش بلي تحكم فيا
انا الي نحكم في الذات وماشي ذاتي تحكم فيا
الجبدة ولات زوج جبدات من بعد قارو من بعد كمية
من بعد ولات اذا والات بدات بشوية تكبر الحية
مناسبات من بعد عادات من بعد زوخ ورجولية
من بعد ولات تمشي فالذات ولات هي الي تمشي فيا
وين نهرب نلقاها جات حتى لعندي تحوس عليا
وتقابرني فالشدات حتى نصيبها بين يديا
تحرقت ولات فتات تلوات وتستنى فيا
نجبد وحدة زوج تلات لتم تتبدل العقلية
نوليت نشوف في حاجات عمري ماشفتهم بعينيا
حياة خير من هاذ لحياة ودنيا خير من هاذ الدنيا
دنيا وحدوخرا اتبنات باش تكون مخدومة ليا
مافيها عذاب لامعاناة لا تعب لا مسؤولية
وين مانحب نروح نبات دنيا كامل بين يديا
لحجر تردهم مخدات والتراب يولي حنين عليا
نطيح او نرقد وين جات نغمض عينيا او ننسى شويا
ننسى الماضي الي فات وننسى الي راهو يستنى فيا
ونزيد ننسى حتى منين جات كيفاش لحقت بين يديا
ننسا بلي عملت حاجات باش دبرتها ولحقت ليا
لمهم ننسى غير ساعات نرقد ولما نحل عينيا
نسمع داخل راسي حاجات وكلي حس يقلق فيا
ويقول لي هاذا ليل وفات هاذي ليلة فاتت خلوية
وياريت كانت ليلة وفرات وكانت المرة اللخرانية
هاي لحكاية عاودت بدات دايما لحكاية هي هي
الليلة وين رايح نبات لازم نقضي قبل لعشية
لازملي مخدرات لازم قارو ولا كمية
ولا قطرة ولا حبات ولا غبرة المهم هي
حكمت فيا ودرك فرات درك خلاص اتطفرت فيا
العقدة ولات زوج عقدات والدنيا راهي تعقدت عليا
يانكملها كيما بدات ونشوف فيها تقتل فيا
يانحبسها كيما جات ياتحبسلي حياتي هي
مادام لحقت للممات اما فيها ولا فيا
جابلي ربي باراكات الي خسرتو بزاف عليا
خسرت وخسرت بزاف حاجات وهذا كامل بسبابها هي
خسرت ربي خسرت الصلاة خسرت الدين وخسرت الدنيا
خسرت مالي وصحتي رشات خسرت خاوتي وخسرت والديا
خسرت ولاد وخسرت بنات ولاو كامل يهربو عليا
خسرت عمري وخسرت اوقات قلبي مات وحتى العقلية
وبصراحة في ثلث كلمات ولات ماعنديش شخصية
حاجة وحدة برك بقات حاجة وحدة مازالها حية
الروح مدام مازالها في الذات نقدر نوقف على رجليا
نقصد رب المخلوقات نسجدلو وندير النية
ومادام النية لربي صفات بلاشك راو رايح يسمع ليا
هو الي يحيي لموات سبحانو نرفدلو يديا
يامجيب الدعوات اهديني واعفو عليا
وافتح قلبي للصلاة وامسح الدمعة من عين والديا
واعفيني مالمخدرات وارفع عنا هاذ البلية
اونوعدك كيما بدات انحبسها غير بالشوية
ونعاود نخلف كل مافات ونفتح لروحي صفحة نقية
ونختم كلامي بالصلاة والصلاة على خير الانبيا
محمد سيد المخلوقات والحمد لله على الساعة هاذيا
فيصل كرشوش كتب لبيات ولو لحكاية مصراتليش ليا
بصح هاذ لحكاية صرات لناس بزاف عزاز عليا

كلمات: فيصل كرشوش

منتظرة ردودك
تحياتي

الوقيع :جلال